Manifestacións na emigración polo desastre do
“Prestige”
Os galegos de Bruxelas, Madrid e Barcelona
organizaron manifestacións en protesta pola actitude do goberno español e o
galego na resolución da catástrofe ecolóxica do petroleiro “Prestige” o mesmo
día que a organizada pola Plataforma “Nunca máis” en Compostela. En Madrid, e a
pesares das dificultades, da pouca difusión da convocatoria, do escaso
seguimento mediático, o domingo 1 de decembro a Porta do Sol reuniu a máis de
2.000 persoas. O acto comezou coa lectura dun
manifesto, exactamente igual ó de Santiago, e que posteriormente se trasladou ó
castelán.
Consignas ecoloxistas, protestas polo verquido e a esixencia de
responsabilidades políticas foron a música de fondo que se escoitou hoxe na
capital do Estado. Decenas de pancartas de distintos colectivos, bandeiras de
partidos políticos e asociacións independentes demostraban a heteroxeneidade
dunha protesta que non ten un só pai. Os congregados falaban da escasa
repercusión que tivo a convocatoria da concentración nos medios de comunicación.
Os asistentes reprocharon ós xornalistas de medios madrileños a cobertura que se
están a realizar do desastre do Prestige e a escasa crítica ás actuacións
guvernamentales que se escoita neles.
En Barcelona os
asistentes foron 1.000 persoas que se concentraron diante da catedral en apoio
da plataforma 'Nunca máis'. Estivo presente Rafael Mouzo, alcalde de Corcubión,
que dixo que "haberá un antes e un despois desta traxedia". Fraga demisión",
"Responsables demisión", "Percebes somos, percebes seremos, por chapapote nunca
pasaremos", "Mariano Rajoy perde fuel-oil"... eran algúns dos lemas coreados
polos participantes.
